UM OKKUR

FUGLAR FJARAN FRELSIÐ

Melar gistiheimili, Bakkagötu 3, Kópaskeri

Gistiheimilið Melar er fjölskyldurekið gistihús á Kópaskeri, litlu þorpi við Öxarfjörð norður við heimskautsbaug. Húsið, sem er elsta íbúðarhús þorpsins, hefur verið gert upp frá grunni en það var upprunalega byggt árið 1930.

Boðið er upp á gistingu í tveggja og þriggja manna herbergjum með sameiginlegri snyrtingu, auk þess sem hægt er að leigja stúdíóíbúð á jarðhæð hússins. Morgunverður er í boði fyrir þá sem það kjósa.

Á sjávarkambinum við gistiheimilið Mela eru heitir pottar, Bakkaböðin, en þar býðst gestum að fara í heita potta og sjóböð við óviðjafnanlegar aðstæður. Úr pottunum má ganga niður í fallega sandfjöru með þéttum svörtum sandi. Í fjörunni spígspora sandlóur og tjaldar. Þarna er kjörin aðstaða til að skella sér í sjóinn.
Þorpið Kópasker er í um klukkustundarakstur frá Húsavík, í um 37 km fjarlægð frá Ásbyrgi og Hljóðaklettum og um 60 km fjarlægð frá Dettifossi. Þorpið er hluti af Norðurstrandaleiðinni sem nýtur vaxandi athygli ferðamanna sem kjósa að ferðast og upplifa fáfarnari slóðir á norðurhluta Íslands. Svæðið er einstakt hvað varðar fjölbreytileika í fuglalífi og fuglaskoðunarhús er í þorpinu.

Í stuttum bíltúr frá Kópaskeri má keyra að heimskautsbaugnum, heimsækja Raufarhöfn með sitt Norðurheimskautsgerði og skoða fjörur og fuglabjörg á Melrakkasléttunni. Einnig má njóta norðurljósanna við bestu mögulegar aðstæður þegar þau skína í sveitunum í kringum Kópasker.

Gistiheimilið Melar er opið frá 1.júní til loka september.
Ljósmyndir á heimasíðu Mela eru teknar af Hildi Óladóttur og Guðmundi Erni Benediktssyni.